Muhammet Fethullah Gülen Hojaýefendi 1938-nji ýylda Erzurum şäheriniň Pasinler etrabyna degişli Korujuk obasynda dünýä inýär. Onuň nesil daragty pygamberimiz Muhammede (s.a.w.) barýar. Kakasy Ramiz hoja ymamlyk edip, ejesi Refiýa hanym bolsa öý hojalykçysy bolupdyr. Maşgalanyň ilkinji perzendi bolan Fethullah Gülen Hojaýefendiniň bäş erkek iki gyz – ýedi dogany bardyr. Ol entek oglanjykka Kurany doly ýat tutýar. Hojaýefendi ilki Osman Bekdaş hojadan, soňra-da Erzurumyň beýleki meşhur alymlaryndan sapak alýar. Ol medrese okuwynyň gapdalyndan uly sopularyň dergählerinden, dergählerde geçirilýän söhbetlerden-de daşda galmandyr. Gulluga gitmezinden öň we soň Edirne şäherinde "Üç şerefeli" diýen mesjitde dört ýyl hem ymam, hem-de wagyzçylyk edýär. Ankara – Mamak we Iskenderunda gulluk borjuny ýerine ýetirýär. Gullukdan soň Edirnä dolanyp gelýär. Ol ýerden Kyrklareli şäherine iberilýär. Bu şäherde hem bir ýyl wagyzçylyk edýär. 1966-njy ýylda Izmir şäherine wagyzçy bellenen Fethullah Gülen Hojaýefendi Kestanepazary mesjidinde wagyzçylyk etmek bilen bir hatarda mesjide degişli Kuran öwrediş kursunyň hem dolandyryjysy bolup işleýär. Bularyň daşyndan 1971-nji ýyla çenli Günbatar Anadolynyň dürli şäher we etraplarynda wagyz we söhbetler edýär.
